A Comisión Permanente trata o programa de traballo para 2021 e tramita a proposta de ditame sobre a universidade privada e o informe sobre coidados de longa duración
A Comisión Permanente do CES tratou na súa sesión de hoxe o plan de traballo do organismo para este ano, un programa de actividades que aínda non está pechado por mor das condicións variables que vai impoñendo a situación sanitaria. Na reunión, a Comisión deu trámite tamén á proposta de ditame sobre a autorización para a universidade privada e elevouna ao Pleno. Do mesmo xeito, tramitou a proposta de informe sobre O sistema de coidados de longa duración en Galicia desde a perspectiva da prestación de servizos e a creación de emprego. Ámbolos documentos serán aprobados nunha vindeira sesión plenaria, prevista para o día 19 deste mes.
O CES celebra de xeito virtual a sesión de constitución do seu novo Pleno
O novo Pleno do Consello Económico e Social de Galicia quedou constiuído hoxe nunha sesión celebrada a través de videoconferencia que contou coa presencia do conselleiro de Facenda e Administración pública. Debido as limitacións consecuencia da covid-19, os membros do organismo foron convocados a unha sesión telemática para facer efectiva a constitución do novo plenario, logo da renovación publicada no DOG o pasado decembro e adiada ata a data polas restricións sanitarias.
Na imaxe, o conselleiro de Facenda e Administración Pública, Valeriano Martínez, e o presidente do CES, Agústin Hernández.
Os CES españois integrados na RTA tentan consensuar unha postura básica común sobre a revisión da Rede Transeuropea de Transportes para o Espazo Atlántico
O Consello Económico e Social de Galicia, xunto cos seus homólogos de Andalucía, Estremadura, Castela e León e País Vasco, agrupados no marco da Rede Transnacional Atlántica (RTA), celebraron unha reunión telemática para a posta en común das súas posturas sobre o documento de traballo que está a elaborar a organización titulado “Cara unha revisión da Rede Transeuropea de Transportes (RTE-T) para o Espazo Atlántico”.
Esta sesión serviu para consensuar unha postura básica común dos CES atlánticos españois diante do documento, que expón as prioridades da RTA de cara a este proceso de revisión da RTE-T. Este acordo non exclúe nin limita as pretensións particulares de cada un dos territorios participantes.
O director xeral de Planificación o Orzamentos explica as liñas mestras dos fondos europeos para a recuperación nunha sesión da Comisión Permanente
O director xeral de Planificación o Orzamentos, Miguel Corgos, asistiu a unha sesión telemática da Comisión Permanente para explicar as liñas mestras dos fondos europeos para a recuperación e os proxectos nos que está a traballar o seu departamento.Vinte e cinco anos do Pleno de constitución do Consello Económico e Social
Este vindeiro 30 de xaneiro cúmprense 25 anos desde a celebración da constitución do Consello Económico e Social de Galicia, nunha sesión que tivo lugar nas dependencias da Xunta en San Caetano. Nun acto presidido polo titular da Xunta de Galicia nese momento, Manuel Fraga, e coa presencia dos conselleiros de Economía e Xustiza, tomou posesión do seu cargo o primeiro presidente da nova institución, Luis Suárez-Llanos Gómez, o seu secretario xeral, Carlos Monclús, e os representantes das distintas entidades e institucións da sociedade civil organizada que forman o organismo consultivo.
Xa naquel lonxano día, os seus responsables insistiron na cooperación e o consenso como guías do seu traballo como foro permanente de diálogo e deliberación entre os axentes económicos e sociais. Logo destes 25 anos, ese segue a ser o espírito que se mantén no CES. Cambiaron os presidentes e os membros, as formas de traballo e a proxección da insitución na sociedade, pero se conserva a idea de recoller, dentro das lexítimas discrepancias dos intereses variados, unha voz común como mellor medio de poñer en valor a contribución deste Consello ao desenvolvemento da sociedade galega.
Na imaxe pequena, o presidente Suárez-Llanos (á esquerda) durante o acto, na fotografía de F. Blanco que publicou El Correo Gallego o 31/01/96. Arriba, a esquerda, o salón do Pleno na actualidade; á dereita, o Pazo de Amarante, en Santiago de Compostela, sede do CES.
O sector da economía social cambia o seu representante no Pleno do CES
María del Mar Pernas Márquez é desde hoxe, logo do publicación do seu nomeamento no DOG, membro titular do Consello Económico e Social de Galicia en representación do sector da economía social.
Páxinas
- « primeira
- ‹ anterior
- …
- 27
- 28
- 29
- 30
- 31
- 32
- 33
- 34
- 35
- …
- seguinte ›
- última »