A asignación presupostaria prevista para o CES no vindeiro exercicio garante a continuidade da actividade do organismo consultivo con rigor e calidade no cumprimento das súas funcións. Así o salientou o presidente do Consello, Manuel Pérez, durante a súa comparecencia de hoxe diante da Comisión de Orzamentos do Parlamento de Galicia. Na intervención, Pérez fixo un repaso ás iniciativas desenvolvidas polo organismo neste ano que remata e adiantou algunhas das actividades previstas para o vindeiro curso. Cun incremento mínimo respecto a este ano, o orzamento do CES para 2026 achegarase aos 1.160.000 euros.
Os voceiros dos distintos grupos parlamentarios gabaron o labor desenvolvido polo CES como representación da sociedade civil organizada, a súa independencia e o rigor dos documentos que publica e valoraron especialmente que as opinións que expresan apuntan os problemas da sociedade galega.