O CES partipou hoxe, coa presencia do seu secretario xeal, na reunión do Comité de Seguimento do programa FEDER Galicia 2021-2027, que se celebrou en Compostela. No seo do Comité déronse a coñecer os proxectos que a Xunta de Galicia impulsará nos próximos anos en materia de vivenda, cos que se financiará a rehabilitación de edificios destinados a alugueiro social. Ademais, co FEDER apoiarase ao sector da automoción a través do desenvolvemento de proxectos de innovación industrial e levando a cabo medidas de eficiencia enerxética e de emprego de enerxías renovables.
O Comité coñeceu ademais as distintas iniciativas de comunicación e divulgación do destino dos fondos europeos que recibe Galicia. Salientouse, entre outras, a iniciativa de percorrer diferentes localidades galegas cunha exposición itinerante onde se amosarán os proxectos concretos nos que se materializan os fondos europeos recibidos.
A reunión contou coa participación do conselleiro de Facenda e Administración Pública, Miguel Corgos, que lles deu a benvida en Santiago de Compostela aos membros do Comité. A xuntanza estivo presidida polo director xeral de Cohesión e Fondos Europeos da Consellería de Facenda e Administración Pública, Ángel Tarrío, e por representantes da Autoridade de Xestión do Programa. Ademais, estiveron presentes membros do Ministerio de Hacienda e da Comisión Europea e das organizacións económicas e sociais con máis representatividade en Galicia.