O presidente do Consello Económico e Social de Galicia, Manuel Pérez Álvarez, entregou hoxe ao presidente do Parlamento, Miguel Ángel Santalices Vieira, a Memoria sobre a situación económica e social de Galicia 2024 elaborada polo organismo consultivo. No encontro participou tamén a presidenta de turno da Comisión encargada da elaboración do documento, Natividade López Gromaz, membro do Consello en representación da CIG. Como cada ano, o CES remite ao Parlamento o informe socioeconómico para que quede a disposición dos distintos grupos políticos. Por suposto, o documento está dispoñible tamén nesta páxina web.
Cunha estructura similar á de anos anteriores, a memoria presenta cinco capítulos principais que se ocupan do panorama económico; do mercado de traballo e as relacións laborais; do dinamismo do tecido produtivo; da calidade de vida e o benestar social; e dos recursos e capacidades para o desenvolvemento.
Ademáis, e como elemento diferencial respecto a outros informes ou estudos, inclúe un capítulo de Consideracións no que se recollen as opinións consensuadas dos axentes económicos e sociais sobre os distintos aspectos que se tratan, como a evolución demográfica, a actividade e o emprego, a estrutura produtiva, a saúde, a pobreza, a cultura, o medio ambiente, a formación ou a investigación e tecnoloxía.
Na imaxe, un momento do encontro no despacho de presidente do Parlamento.
Na imaxe inferior, o presidente do Parlamento, Miguel Santalices, e o presidente do CES, Manuel Pérez.
