Unha representación de membros do Consello Económico e Social de Galicia, encabezada polo presidente do organismo, Manuel Pérez, visitou hoxe o asteleiro de Navantia en Ferrol e tivo ocasión de coñecer de primeira man a realidade desta empresa punteira. Atendidos por responsables da instalación, os visitantes comenzaron cun repaso á historia do asteleiro, tres séculos de construción naval que son parte da identidade e idiosincrasia da cidade departamental. Pero tamén tiveron ocasión de comprobar o día a día actual, cun recorrido por distintos talleres onde se constrúen as avanzadas fragatas da serie F-110, de deseño propio de Navantia e que son un paso adiante sobre a serie anterior.
Unha das características máis salientables da empresa en Ferrol é a decidida aposta pola innovación e a sostibilidade, co deseño de solucións de vangarda, como xemelgos dixitais dos buques ou a investigación avanzada liderada polo Centro de Innovación e Robótica que, creado en 2022, representa un piar clave na transformación dixital da compañía e na modernización da construción naval. Os visitantes poideron comprobar que as instalacións xa adoptaron o Asteleiro 4.0 e a dixitalización dos procesos.
O colofón do recorrido foi a nova fábrica dixital de bloques (FdB), aínda en construción pero xa moi avanzada. Os seus responsables explicaron aos membros do CES que a FdB é un programa tractor que cubre desde a preparación e elaboración do aceiro ata a formación de bloques e subbloques (as enormes pezas coas que se formarán os buques) e incluirá equipos robotizados de soldadura laser, control de pintado e sensores que permitirán a activación dun xemelgo dixital da instalación.
Os membros do Consello calificaron da visita de moi interesante e instructiva e agradeceron aos infitrións a súa implicación e amabilidade.
Na imaxe, foto de familia na entrada dun dos talleres de montaxe.
