O futuro de Galicia “será dixital ou non será”

A Universidade de Vigo (UVigo) presentou este xoves un informe encargado polo Consello Económico e Social de Galicia (CES) titulado ‘Galicia 2030: unha dixitalización 4.0 para unha sociedade 5.0’, no que se reivindica a importancia destas novas tecnoloxías e da capacidade de adaptación para o futuro da Comunidade. PUBLICIDADE “A dixitalización non é o futuro. Xa está aquí e require iniciativa e capacidade de adaptación”. Así de rotundo foi o catedrático da UVigo Xosé H. Vázquez na presentación do documento. Neste acto, levado a cabo no salón de graos da Facultade de Ciencias Económicas e Empresariais, tamén estiveron presentes, entre outros, o reitor, Manuel Reigosa; o presidente do CES, Agustín Hernández, e o presidente da Confederación de Empresarios de Pontevedra, Jorge Cebreiros, quen coincidiron en que o futuro de Galicia “será dixital ou non será”. “Vivimos inmersos nunha nova revolución tecnolóxica, a dixital, e por máis que nos esforcemos, tal e como sucedeu con calquera outra das revolucións tecnolóxicas anteriores, non é posible predicir con precisión como vai cambiar a vida das persoas a medida que a dixitalización avanza”, engadiu o coordinador do informe. Vázquez fixo fincapé en que a pesar de que o futuro “está por escribir”, escríbese “desde hoxe” e as decisións que agora se toman terán un impacto nas sociedades 5.0 “centradas nas persoas” e que integrarán o ciberespazo e o espazo físico. Pola súa banda, o presidente do CES destacou que o importante é conseguir con esta revolución mellores traballos para as persoas e de máis calidade. Na mesma liña falou Jorge Cebreiros, quen explicou que ata agora a dixitalización era algo diferencial das grandes empresas, pero as crises dos últimos anos fixeron que as pequenas compañías tamén comezasen a dixitalizarse “e con moito éxito”. Reigosa destacou que Galicia conta con fortalezas que fan que a Comunidade sexa capaz de competir e facer as cousas “igual de ben ou mellor” que noutros puntos de Europa grazas a dispor dunha mocidade “ben formada” cun sistema universitario que está a xerar coñecemento. INFORME Elaborado a partir da realización de máis de 600 entrevistas, as conclusións do informe fan fincapé en que esta adaptación á Sociedade 5.0 require actuacións en moitos ámbitos, tanto no apartado político, como na educación, no emprego ou nas empresas. No que se refire a a dixitalización das políticas públicas, Xosé H. Vázquez considerou que os alicerces da transformación dixital deben verse reflectidos en dous tipos de políticas: por unha banda, no estímulo da transformación estrutural da economía cara á súa dixitalización, con políticas de I+D, de apoio ao emprendimiento ou estímulos á modernización tecnolóxica; e por outro na reforma das institucións que configuren as ‘regras de xogo’ do ecosistema empresarial galego. En canto ao emprego e as prestacións sociais, o informe destaca que os retos relacionados co paro, os salarios e a polarización da riqueza van requirir políticas activas e pasivas de emprego “moito máis intensas e eficaces”. Así, predí que a introdución da intelixencia artificial e a substitución de certos postos de traballo por máquinas terá un impacto moito maior que os que produciron as outras revolucións tecnolóxicas previas. A educación tamén terá que adaptarse, cunha reforma dos seus contidos formativos máis flexible para atender á natureza dos estudos e responder tanto as necesidades das empresas como da sociedade. No capítulo de infraestruturas, o informe subliña que Galicia conta cun nivel “razoable” de implantación tanto de redes fixas como móbiles, mentres que o documento marca como prioridade as cuestións relacionadas coa privacidade dos datos e a ciberseguridade, entre outros aspectos.