Para o cumprimento destes obxectivos, o CES-Galicia ten asignadas (art. 5º e Disposición Adicional 2ª) diversas funcións, que se concretan nas seguintes:

A) Emitir ditames (a solicitude preceptiva ou facultativa) sobre proxectos de disposicións normativas e plans xerais ou sectoriais.

1.- Ditames de solicitude preceptiva (art. 5º Lei de creación). Califícanse como tales os que versen sobre:

1.1.- Anteproxectos de lei e proxectos de decretos lexislativos que regulen materias socio-económicas directamente vinculadas ó desenvolvemento económico e social de Galicia (a norma contempla unha única excepción: o proxecto de lei de Presupostos Xerais da Comunidade Autónoma).

1.2.- Plans xerais ou sectoriais que teñan relación cos indicados campos.

1.3.- Anteproxectos de lei ou proxectos de disposicións administrativas que afecten á organización, competencias ou funcionamento do propio CES.

1.4.- Materias que teñan que ser consultadas ó CES por precepto expreso dunha lei.

2.- Ditames de solicitude facultativa (art. 5º 1.2. da Lei de creación). Son os referentes a asuntos ou materias (non comprendidos no anterior apartado) que sexan sometidos a consulta polo Consello da Xunta de Galicia ou polos seus membros. Aínda que a normativa do CES-Galicia non o especifique expresamente, a materia obxecto de ditame ten que moverse tamén nese ámbito obxectivo do económico-social que dá sentido ó Consello. Todo parece dar a entender que obxecto directo do Ditame solicitado debe ser un proxecto de disposición normativa (Decreto, Orden), porque para a solicitude de pronunciamentos do CES-Galicia sobre outros temas ábrese na Lei de creación a vía da solicitude de informes ou estudios (art. 5º.2).

A decisión de remitir ou non a consulta o proxecto de disposición administrativa corresponde adóptala á consellería correspondente (ou o propio Consello da Xunta) en función da especial transcendencia económico-social do contido da disposición.

B) Elaborar estudios ou informes sobre reformas na normativa vixente ou sobre a elaboración de plans e programas para favorece-lo desenvolvemento económico e social de Galicia.

Estes traballos poden ser elaborados por propia iniciativa ou a solicitude da Xunta de Galicia e deberán versar sobre as reformas na normativa vixente que se estimen necesarias para favorece-lo desenvolvemento económico e social de Galicia ou sobre a elaboración de plans e programas dirixidos á mesma finalidade.

C) Dar a coñecer ó Goberno galego a súa opinión sobre a execución dos plans e programas de especial transcendencia para o desenvolvemento económico e social de Galicia, a través da emisión de opinións-recomendacións (art.5º 2 e 3). Ademais, o Consello pode, con ocasión da elaboración da súa Memoria sobre a situación económica e social de cada ano, plantexar recomendacións ou orientacións sobre a política presupostaria da Xunta.

D) Participar en mesas sectoriais xunto con representantes da Administración autonómica para debater problemas específicos que afecten a sectores estratéxicos de Galicia e definir posibles liñas de actuación (Disposición Adicional Segunda). O CES-Galicia poderá propoñer á Xunta de Galicia a convocatoria de Mesas Sectoriais nas que participen non só as organizacións representadas no mesmo, senón tamén a Administración autónoma, ó obxecto de debater problemas específicos que afecten a sectores estratéxicos de Galicia, a fin de defini-las posibles liñas de actuación. Estas mesas sectoriais son tamén o instrumento para evacua-los informes requeridos pola normativa da Unión Europea.

E) Elaborar e remitir anualmente ó Consello da Xunta unha Memoria sobre a situación socioeconómica, incluíndo, no seu caso, recomendacións ou orientacións sobre a política presupostaria (art. 5º 3). A normativa do Consello especifica que debe remitirse anualmente á Xunta unha memoria sobre a situación económica e social en Galicia. O seu obxectivo é informar dos datos máis relevantes que configuran a realidade socioeconómica de Galicia no ano anterior á súa publicación.